NAJNi ELE
Gome de viye, Najniya mı Ele
Domanu céré gomi kerd zelemele
Vake, vergi gureta pirık Ele
Çıra qederé to bi feké dele
Gomo under, dewe ra ki duri
Kameji serre, néno ra mı viri
Dormé gomu de ki bivi hazıri
Vergu verdéne male béwayiri
A; maa jü çéna ho u hiré lazu
Vergi verdané ve mali, é rozu
Domani bijeku bené caé verozu
Hona néwe çiçeg day vi çérazu
Rozé da asma usari Ağwrél'e
Uza domonu kerd ve zelemele
Vake "Vergi gurete Pirik Ele!"
Verg niyo, na deleverga, dele
Dele nişta, bıné gula bıze ra
Bıze kaskena bena, ho dıme ra
Nejni Ele ki, gomi lewe de ra
Se ke hesno, usta ve ho sera
Serva ju bızé da kuda lenge ra
Najnie nora deleverge dimera
Veyve ki newe améyvi awxera
A ki, a deqa néasena tevera
Deleverge bıza kude caverdé
Domanu périne pıro sérkerdé
Kes ki, lewe de çino ke, meverdé
Kaşçéna, undéra bıze bıverdé
Hurdine juvini xéle vetelna
Verge ruye Nejni Ele ruçhıkna
Domoni hem bervai, hem qirai
Ap Useni na qirayişi hesnai
Xıravmalo Ap Usén, çhéré çhéran,
Çıqa ke ve ho kokım vi, yé serran
O mırd nébiyéne eve howt nunan
Çıqa ke phonc roji mendéne vésan
Ap Uşén erjiya şi ve ze şéran
Verde deleverge kuyé ve çuyan
A ye ho est, uste ra seré lıngan
Deleverge gurete-ra pé destan
Kemeré cıdo, çino lewe de kes
O hal, deleverge biya bé nefes
Çimi bivi ra vindi, bivi bé hes
Çenık u lıngu ra ki bi vi geves
Qom bi top, Najni Ele arde dewe
Ma domani néverdaime lewe
Deleverga gewre ardi vi téyi
Ardi vi, eştivi biyaré heté péyi
Roja bine vake se bıkerime
Bijérime ma, heté ser şérime
Taine vake Xarpét meverime
Ma heté Erzıngani ser berime"
Roji vérdi ra, Ap Uşen u Bırazai
Wes u war piya ki peyser cérai
Maré xeveré newey ardi, dai
Céni, camordé ma péro bervai
Najni Ele, uza kerda péyé demıru
Zurra, zé vergu, ho kuyo kemeru
Werte ra çond roji, heftei vérdi
Camordé dewe verva ceneza berdi
Seke arde, berde kerde mezele
Dı métroy xori kerde bıné wele
Najniya mı, e de çınay ra merde
Né thorayime, kesi pers nékerde
Torné Thuji -20.03.2007
Çé Momıdî, vané 'Ma heqi reşime,
Çé Cindî vané 'Ma Çé Momıdî reşime"
Najni Ele
Anasayfa